Dva nova pojačanja za Mladost

Dva pojačanja Mladosti u jednom danu – novi članovi lidera CFL-a su 30-godišnji Zoran Kokot, doskorašnje krilo sarajevskog Željezničara, te 26-godišnji vezista Saša Tomanović, koji je igrao u Srbiji, u dresu Inđije.

Mladost je prethodno dolaskom Glavana našla zamjenu za povrijeđenog Igora Radusinovića. Podsjećamo, klub su u zimskom prelaznom roku napustili vezni igrači Dušan Lagator i Damir Kojašević, koji su otišli u Čukarički, odnosno Vardar.

Kokot igra po lijevoj strani, a opasan je i za protivnički gol, jer često pogađa mrežu. Osim Željezničara, igrao je za belgijski Beveren, iranski Gol Gohar, kao i za Slaviju iz Sarajeva. Tomanović je izrazito visok (191 cm) i u dosadašnjoj karijeri igrao je još za Mladost iz Apatina i Radnički iz Sombora.

Trener Nikola Rakojević u ponedjeljak će izvršiti prozivku, čime će početi pripreme za nastavak sezone. Mladost je prvi dio sezone završila sa devet bodova prednosti u odnosu na Rudar i ima šansu da osvoji prvu titulu.

(Vijesti)